Fréttir frá Íþrótta- og Ólympíusambandi Íslands

30.01.2020
Fréttir frá Íþrótta- og Ólympíusambandi Íslands

Ráðstefna um jafnrétti barna og unglinga

Ráðstefna um jafnrétti barna og unglinga í íþróttum fór fram nýverið. Uppbókað var á ráðstefnuna en hægt er að sjá upptöku af henni á youtube síðu Reykjavíkurleikanna hér.

Megin áherslur ráðstefnunnar:

  • Niðurstöður rannsóknar um aðkomu sveitarfélaga að afreksíþróttum.
  • Jafnréttismál innan íþróttafélaga.
  • Börn af erlendum uppruna og íþróttir.
  • Jafnrétti fatlaðra barna í íþróttum.
  • Viðhorf og óskir barna og unglinga.
  • Trans fólk og íþróttir.

Að ráðstefnunni stóðu: Íþróttabandalag Reykjavíkur, Íþrótta- og Ólympíusamband Íslands, Ungmennafélag Íslands, Háskólinn í Reykjavík og RIG – Reykjavík International Games.
 
 

Þjálfaramenntun ÍSÍ - Vorfjarnám hefst 3. febrúar

Vorfjarnám í Þjálfaramenntun ÍSÍ hefst 3. febrúar nk., bæði á 1. stigi og 2. stigi. Þjálfaramenntun ÍSÍ gefur réttindi til íþróttaþjálfunar. ÍSÍ sér um almenna hlutann og fer öll kennsla fram í fjarnámi. Sérsambönd ÍSÍ sjá um sérgreinahlutann.
Kostnaður: (Fyrirmyndarfélög og deildir fá 20% afslátt fyrir sína þjálfara)
1. stig: 30.000 kr.
2. stig: 28.000 kr.
3. stig: 40.000 kr.

Nánari upplýsingar má finna hér á vefsíðu ÍSÍ.
 
 

Dagur í lífi íþróttafólks - Anton Sveinn McKee

ÍSÍ er með Instagram síðu, @isiiceland, þar sem leitast er við að koma á framfæri því góða starfi sem fram fer í íþróttahreyfingunni. Nú er sjónum beint að íslensku afreksíþróttafólki og fólkinu í landinu leyft að fá innsýn í þeirra daglega líf. Íslenskt íþróttafólk hefur nú sl. vikur skipst á að taka við Instagram síðu ÍSÍ og sýna okkur hinum hvernig dagur í lífi þess er með því að hlaða inn myndum og myndböndum á Instagram Stories.

Anton Sveinn McKee sundmaður ætlar að leyfa okkur að fylgjast með degi í sínu lífi á morgun, en hann er staddur erlendis í æfingabúðum og því nóg um að vera hjá kappanum.

Þeir sem vilja fylgjast með íslensku afreksíþróttafólki æfa, keppa og takast á við hversdagsleikann geta smellt hér, fylgt Instagram síðu ÍSÍ og fengið upplifunina beint í símann.
 
 
 
 

Lífshlaupið 2020 - Hefst 5. febrúar
 
Lífshlaupsárið hefst þann 5. febrúar. Opnað hefur verið fyrir skráningu á vefsíðu Lífshlaupsins www.lifshlaupid.is.
Lífshlaupið er heilsu- og hvatningarverkefni ÍSÍ sem höfðar til allra aldurshópa. Á síðasta ári voru um 17 þúsund virkir þátttakendur í samtals um 500 skólum og vinnustöðum. Verkefnið miðar að því að hvetja landsmenn til að huga að daglegri hreyfingu og auka hana eins og kostur er. Lífhlaupið er góð byrjun á hreyfingu fyrir lífstíð.

Eftirfarandi keppnir eru hluti af Lífshlaupinu:
  • Grunnskólakeppni fyrir 15 ára og yngri í tvær vikur, 5. - 18. febrúar.
  • Framhaldsskólakeppni fyrir 16 ára og eldri í tvær vikur, 5. - 18. febrúar.
  • Vinnustaðakeppni í þrjár vikur, 5. - 25. febrúar.
  • Einstaklingskeppni þar sem allir geta tekið þátt og skráð niður sína daglegu hreyfingu allt árið.
Skráning í Lífshlaupið 2020
Til baka