Fréttir

Fréttasíður UMSS

UMFÍ - Ráðstefnan Ungt fólk og lýðræði

Ungmennafélag Íslands (UMFÍ) stendur nú fyrir ráðstefnunni Ungt fólk og lýðræði í níunda sinn. Yfirskrift ráðstefnunnar í ár er EKKI BARA FRAMTÍÐIN – UNGT FÓLK, LEIÐTOGAR NÚTÍMANS.

Ráðstefnan fer fram dagana 5 – 7. apríl næstkomandi á Hótel Laugabakka í Miðfirði.

Ráðstefnan er ætluð ungu fólki á aldrinum 16 – 25 ára. Fjöldi þátttakanda er takmarkaður við 80 manns eða tvo þátttakendur frá hverju ungmennaráði auk starfsmanns ef vill. Þátttakendum yngri en 18 ára þarf að fylgja fullorðinn einstaklingur. Þátttökugjald er 15.000kr. á hvern einstakling. Innifalið eru ferðir, uppihald og ráðstefnugögn.

Ungmennaráð UMFÍ sér um framkvæmd og skipulag ráðstefnunnar.

Skráningafrestur er til 17. mars næstkomandi.

Smelltu hér til þess að skrá þig.  

Ertu með spurningu? – sendu þá línu á netfangið ungmennarad@umfi.is eða sendu póst á sabina@umfi.is eða ragnheidur@umfi.is

Viltu vita hvað UMFÍ gerir með ungu fólki?

UMFÍ og Ungmennaráð UMFÍ stóðu fyrir Umræðupartýi UMFÍ í byrjun febrúar. Þetta var fyrsta umræðupartýið af fjórum. Þarna hittu ungmenni framkvæmdastjóra sambandsaðila og aðildarfélaga UMFÍ og ræddu þau saman um eitt og annað sem félögin geta gert fyrir ungt fólk. Þetta var frábær og fjölmennur dagur.

 

 

Nóri skráningar- og greiðslukerfi

Kæru foreldrar, forráðamenn og íþróttaiðkendur.

Opnuð hefur verið ný skráningar- og greiðslusíða NÓRI á vegum Ungmennasambands Skagafjarðar (UMSS) og Sveitarfélagsins Skagafjarðar.

Til að byrja með verður hægt að skrá iðkendur sem eru á æfingum/námskeiðum hjá UMF Tindastól í frjálsum, júdó, knattspyrnu, körfubolta og í sundi. Einnig geta þeir sem eru á æfingum/námskeiðum hjá Ungmenna- og Íþróttafélaginu Smára í Varmahlíð skráð sína iðkendur.

Hægt er að skipta upp greiðslum með greiðsluseðli (seðlagjöld koma á þessar greiðslur) og kreditkorti, eða staðgreiða með Maestro Debitkorti.

Skráning fer fram hér.

Leiðbeiningar um skráningar má finna hér.

Nánari upplýsingar á netfanginu umss@umss.is eða í síma 453 5460.

 

Sýnum karakter

 „Sýnum karakter“ er átaksverkefni um þjálfun sálrænnar og félagslegrar færni barna og ungmenna í íþróttum. Hugmyndafræði verkefnisins byggir á að hægt sé að þjálfa og styrkja sálræna og félagslega færni iðkenda eins og líkamlega færni.  



Áherslan í íþróttaþjálfun hefur til þessa verið á líkamlega og tæknilega færni. Helsta markmið með verkefninu er því að hvetja þjálfara og íþróttafélög til að leggja enn meiri og markvissari áherslu á að byggja upp góðan karakter hjá iðkendum, með þjálfun sálrænna og félagslegra eiginleika barna og ungmenna. Þjálfun karakters barna og ungmenna í íþróttum gerir íþróttafélögum kleift að sinna hvort í senn uppeldishluta og afrekshluta íþróttastarfsins, því góðir karakterar eru vel í stakk búnir til að takast á við lífið og einnig til að ná árangri í íþróttum.



Sýnum karakter er viðbót við stefnu og annað fræðsluefni íþróttahreyfingarinnar og byggir á því að nokkru leyti. Þar er bætt við hagnýtum upplýsingum og aðferðum sem þjálfarar geta nýtt sér í þjálfun barna og ungmenna með einföldum hætti. Verkefnið er þó hvorki altækt né endanlegt. Þvert á móti er því ætlað að þróast og dafna með framlagi þjálfara – og annarra sem áhuga hafa - sem hafa tækifæri til að koma með ábendingar og frekari fræðslupunkta inn í verkefnið. Verkefnið Sýnum karakter er að þessu sögðu hugsað sem upphaf að faglegri vinnu í þjálfun karakters en ekki sem endapunktur.



Markhópur verkefnisins Sýnum karakter er öðru fremur fyrst og fremst þjálfarar barna og ungmenna í íþróttum. Mikilvægt er þó að allir sem koma að íþróttastarfi barna og ungmenna, stjórnarfólk, starfsfólk, kennarar og foreldrar, kynni sér innihald og áherslur verkefnisins. Ef allir vinna saman að því að bæta og styrkja karakter ungu kynslóðarinnar þá verður framtíð þeirra - og okkar allra - enn bjartari og betri.



Grunnhugmyndin að verkefninu kemur frá dr. Viðari Halldórssyni, félagsfræðingi við Háskóla Íslands, og Valdimari Gunnarssyni hjá UMSK. Á undanförnum misserum hefur verkefnið verið prófað og þróað innan UMSK og er nú svo komið að stærstu íþróttahreyfingar Íslands, Ungmennafélag Íslands (UMFÍ) og Íþrótta- og Ólympíusamband Íslands (ÍSÍ), hafa tekið höndum saman um það að koma verkefninu á framfæri út í íþróttahreyfinguna. Styrktaraðilar verkefnisins eru Íslensk Getspá og mennta- og menningarmálaráðuneytið.



Það er von okkar að verkefnið hjálpi þjálfurum og fleirum að tileinka sér aðferðir og leiðir til markvissrar þjálfunar karakters ungu kynslóðarinnar og beiti þeim í daglegu starfi. Það er í allra hag.



Sýnum karakter!

(upplýsingar fengnar frá http://synumkarakter.is/um-verkefnid)

Lífshlaupið - Landskeppni í hreyfingu

 Í morgun, miðvikudaginn 1. febrúar kl: 09:00, var Lífshlaupið ræst í tíunda sinn í Íþróttahúsi Holtaskóla, við Sunnubraut í Reykjanesbæ.



Lífshlaupið er heilsu- og hvatningarverkefni Íþrótta- og Ólympíusambands Íslands sem höfðar til allra landsmanna. Markmið þess er að hvetja landsmenn til að gera hreyfingu að föstum lið í lífi sínu, hvort sem er í frítímanum, í vinnunni, í skólanum eða við val á ferðamáta.



Lífshlaupið skiptist í fjóra keppnisflokka:

• vinnustaðakeppni frá 1. – 21. febrúar, fyrir 16 ára og eldri (þrjár vikur)

• framhaldsskólakeppni frá 1. – 14. febrúar, fyrir 16 ára og eldri (tvær vikur)

• grunnskólakeppni frá 1. – 14. febrúar, fyrir 15 ára og yngri (tvær vikur)

• einstaklingskeppni þar sem hver og einn getur skráð inn sína hreyfingu allt árið



Til þess að taka þátt í keppninni þarf að skrá sig til leiks á heimasíðu Lífshlaupsins. Börnum 15 ára og yngri er ráðlagt að hreyfa sig í a.m.k. 60 mínútur á dag og 16 ára og eldri a.m.k. 30 mínútur á dag.



Heimasíða verkefnisins er einföld og þægileg í notkun en ný síða var tekin í notukun á síðasta ári. Allt skráningarferlið er orðið mun einfaldara og síðan er aðgengileg í öllum snjalltækjum. Nú er einnig hægt að lesa inn í Lífshlaupið úr bæði Strava og Runkeeper. Þegar búið er að skrá sig inn í kerfið og farið er í að skrá stigin er hægt að ná í færslur úr Strava og Runkeeper.



ÍSÍ hvetur alla landsmenn til þess að taka þátt í Lífshlaupinu og skapa skemmtilega stemningu og auka félagsandann á sínum vinnustað eða í sínum skóla.



Nánari upplýsingar um Lífshlaupið og skráningu gefur Hrönn Guðmundsdóttir, sviðsstjóri Almenningsíþróttasviðs ÍSÍ, á hronn@isi.is, eða í síma: 514-4000. Einnig er hægt að senda fyrirspurnir á netfangið lifshlaupid@isi.is.



Samstarfsaðilar ÍSÍ vegna Lífshlaupsins eru: Advania, Rás 2 og MS

UMFÍ - Umræðupartý fyrir ungt fólk (18-30 ára)

 

UMFÍ mun standa fyrir umræðupartýi fyrir ungt fólk (18-30 ára) föstudaginn 3. febrúar þar sem rætt verður um stefnu UMFÍ og framtíðarsýn.

Umræðupartýið fer fram milli kl 17:00 – 19:30 í húsnæði UMFÍ í Reykjavík. Tilgangur partýsins er að ná fólki saman, bæði forystufólki innan ungmennafélagshreyfingarinnar og ungmennum. Jafnframt er markmiðið með partýinu að gefa ungmennum tækifæri til þess að koma skoðunum sínum á framfæri og hafa þannig áhrif á það hvernig UMFÍ vinnur með verkefni sem hugsuð eru fyrir ungt fólk.



Ungmenni á aldrinum 18 – 30 ára eru því sérstaklega hvött til þess að mæta með stjórnendum félaganna. Ungmennaráð UMFÍ mun sjá um að stýra stuðinu. Glæsilegir vinningar verða í boði fyrir heppna þátttakendur. UMFÍ styrkir ferðakostnað þeirra sem þurfa að ferðast lengra en 50km aðra leið til þess að taka þátt í umræðupartýinu. Athygli er vakin á því að aðeins ódýrasti ferðamátinn er endurgreiddur. Þátttakendur þurfa að skila inn kvittunum til þess að fá ferðakostnað endurgreiddan.



Þeir sem hafa áhuga á að fara eru beðnir að hafa samband við skrifstofu UMSS umss@umss.is

Syndicate content